Оилавий муносабатларга учинчи шахслар аралашуви учун жавобгарлик чораларини қўллаш зарурати: баҳс ва мулоҳаза

Мамлакатнинг бугунги ривожланиш босқичида замонавий тенденциялар ва глобаллашув жараёнларининг жадаллашувида оила институтининг устувор мавқеи ва муқаддас ўрнини мустаҳкамлаш мақсадида оила институти билан боғлиқ муаммоларни тизимли бартараф этишни ва бу борадаги миллий қонунчиликни такомиллаштириш аҳамияти тобора ортиб бормоқда. Бахтли ва фаровон оила бугунги жамиятимизнинг бош ғояларидан бирига айланиб бормоқда. Оилада тинчлик, оила аъзоларининг ўзаро бир-бирларига меҳр-оқибат ва муросали бўлишлари, ҳурмат ҳамда эътиборни сақлаб қолиш, шунингдек, келажак авлодни тарбия қилишда оиладаги соғлом муҳит бирламчи зарурат ҳисобланади. Оилаларда соғлом муҳитни таъминланишда ва оила аъзоларининг бир-бирларига ўзаро ижобий ҳис-туйғулари замирида муносабатда тўсқинлик қилувчи омиллар мавжудки, уларни бартараф этишда замонавий усулларни қўллаш зарурати ҳам ошиб бормоқда.