Миллий қадриятларда яраштирув институтлари тарихидан

Эл осойишталигини таъминлаш, фуқарога ҳар томонлама ёрдам бериш, уларга жабр қилганга нисбатан чора қўллаш ва ҳуқуқий масалаларни ҳал қилишда адолатли бўлишга алоҳида эътибор қилинган. Халқ анъаналари, қадриятлари, урф-одатларида турли ижтимоий низолар маҳалла, уруғ-аймоқлар, оиланинг катталари ва қариндошлар аралашуви билан, ислом арконлари, шариат, фиқҳ тамойиллари асосида, қозилик институти ёрдамида ҳал этилган. Ислом динида одамлар ўртасига нифоқ солиш, душманлик ва келишмовчилик уруғини сепиш, ўзгаларни камситиш, иззат-нафсига тегиш қаттиқ қораланган, мусулмонларни бошқаларни ҳурмат қилишга, уларнинг обрўсини тўкмасликка, ҳис-туйғуларини таҳқирламасликка буюрилган. Жамият аъзолари орасида адоват пайдо бўлиши оқибатида дўстлик ришталари узилади, ўртада низо, ихтилоф пайдо бўлади, ижтимоий алоқалар бузилади ҳамда жамият парокандаликка юз тутади.