Ўсмир фарзандлар билан муносабатлар стратегияси

Шахснинг физиологик, маънавий-руҳий шаклланиши ўта мураккаб жараён бўлиб, ҳар бир ёш даврнинг ўз қонуниятлари мавжуд. Масалан, болаликнинг илк ёшларида дунёни англаш, фазога мослашув ривожланади, кексаликда когнитив ва психомоторик функцияларнинг секинлашуви кузатилади. Ўсмирлик ёши бола тарбиясининг энг мураккаб босқичи саналиб, унда ота-оналардан алоҳида масъулият ва ҳақиқий ғамхўрлик талаб қилинади. Ўсмирлик ёши энг таъсирчан давр бўлиб, бу даврда тўғри йўналтирилган бола тарбияси кейинги ҳаёт учун асос бўлади.